Спектакль 14+ жаштагыларга, эки тилде жүрөт: Кыргыз жана орус тили улам кезектешип, чыгармадагы окуялар поэтикалык көп үндүүлүк менен бирин-бири толуктап турат.

Муздак асман менен карыган океан ашташкан бозомук жээктен Охот аймагынын катаал табияты башталат. Куурчак театрынын касиеттүү сахнасында Чыңгыз Айтматовдун улуу уламышы демейки турмуштун майда-баратынан арылып, адамды сыйкырдуу дүйнөгө жетелеген улуу ритуалга айланат. Мында куурчак, маска, актёр жана жаратылыш стихиялары куюлушуп, бир бүтүн кубатка айланат.

Театр өнөрүндө өзгөчө тил издеген режиссёр Антон Зайцев көрүүчүгө тек гана каргашалуу аңчылыктын баянын сунуштабайт. Бул – жымжырттык кучагында, бир кайыкка камалган төрт муундун тагдыры. Айлананы туман каптап, ичер суу түгөнгөндө, кудуреттүү табият адам баласын аёосуз суроолор менен бетме-бет калтырат: Коркунучтун чеги кайда да, жан аябас улуу сүйүүнүн башаты кайда?

Спектаклдин көркөмдүгү ашыкча жасалгасы жок тазалыкка жана дүйнөнү аяр сезүүгө
негизделген. Сахнадагы кум, суу жана жыгач сыяктуу уңгу элементтерге жан кирет. Кум – кум сааттай колдон суурулган убакытты жана бут алдынан качкан кургак жерди билдирсе, суу – өмүрлөрдү жутуп алган тирүү океандын өзү. Ал эми таза жыгачтан жасалган куурчактар адамдын назик алсыздыгын гана эмес, анын ички бүгүлгүс кубатын, тамырлаштыгын айгинелейт. Актёрлордун колундагы оор аркандар адам тагдырларын чиелеништирип, бирде маңдайга жазылган каргыш, бирде муундарды байланыштырган назик көпүрө болуп өрүлөт. Пластика,музыка жана терең метафоралар аркылуу көрүүчү караңгылыкты жарып өтүп, үмүт шооласына – ар бир адамдын ичинде катылган ошол ыйык Ала Дөбөт аскасына карай жол тартат.

Антон Зайцевдин бул эмгеги куурчак театры тууралуу көнүмүш түшүнүктөрдү бузат. Режиссёр бул өнөрдү заттар дүйнөсүнүн кубаттуу тили аркылуу улуу философиялык маселелерди козгой алган, аң-сезими жетилген көрүүчүлөр үчүн арналган бийик искусство катары ачып берет.

Сахнада кыргыз жана орус тилдери катар жаңырып, бир бүтүн агымды түзөт. Эки тилдин журулушуп турушу өзгөчө бир поэтикалык көп үндүүлүктү жаратат. Бул – Чыңгыз Айтматовдун өз чыгармаларын эки тилде тең куюлуштура жазган улуу өнөрүнүн сахнадагы көрүнүшү.